92-ci ilin sinfi

1990-cı illərin əvvəllərində «Mançester Yunayted» akademiyasının yetirmələri olan gənc oyunçular dünya futbolunun zirvəsinə doğru addımlamağa başladılar. «The Class of '92» sənədli filmi Devid Bekhem, Rayan Giqqz, Pol Skoulz, Nikki Batt, eləcə də Qari və Fil Nevill qardaşlarının keçdiyi birgə yoldan bəhs edir.

Ekran əsəri 1992-ci ildən 1999-cu ilə qədər olan yeddi illik dövrü əhatə edir. Hekayə komandanın otuz ildən sonra qazandığı İngiltərə Gənclər Kuboku ilə başlayır və 1999-cu ildə UEFA Çempionlar Liqasındakı qələbə ilə başa çatır.

2013-cü ildə Böyük Britaniyada istehsal olunmuş filmin rejissorları Bencamin Tyorner və Qeyb Tyornerdir. Layihədə əfsanəvi məşqçi Aleks Ferqyuson, gənclərin tərbiyəçisi Erik Harrison və həmin dövrün futbolçuları yer alıb.