Yeddi qoca və bir qız

Bədən tərbiyəsi institutunu yeni bitirən gənc mütəxəssis Lena idmanda böyük nailiyyətlər arzulayırdı. Lakin ona idmançıları deyil, sıravi vətəndaşlardan ibarət sağlamlıq qrupunu məşq etdirmək tapşırılır. Stadionda gələcək çempionların yerinə partiya işçiləri, fiziki cəhətdən zəif və spirtli içki aludəçisi olan yaşlı kişilər toplaşır.

Öz istəyi ilə işdən ayrılmaq mümkün olmadığı üçün Lena rəhbərliyin onu qovmasına nail olmaq qərarına gəlir. O, bu məqsədlə zəif tələbələrini ağır və yorucu hərəkətlərlə sınağa çəkir. Lakin gözlənilənin əksinə olaraq, komanda üzvləri şikayət etmək əvəzinə gənc məşqçiyə vurulurlar.

«Yeddi qoca və bir qız» musiqili idman komediyasını 1968-ci ildə SSRİ-də rejissor Yevgeni Karelov çəkib. Ekran əsərində baş rolları Svetlana Savyolova, Valentin Smirnitski, Anatoli Adoskin və Boris Novikov canlandırıblar.