Normal olan təkcə mənəm

«Qırmızı şahin» uşaq düşərgəsinin rəhbəri İqor Novojilov yerli mer Viktor Ryurikoviç ilə gizli razılaşma əsasında məkanı qəzalı elan etməyə çalışır. Lakin onların şəxsi mənfəət güdən planları düşərgəyə sağlamlıq imkanları məhdud uşaqların gəlişi ilə pozulur. İqor qonaqları qovmaq üçün təhdidə, rüşvətə və hətta yanğın törətməyə əl atsa da, uşaqlar dincəlmək hüquqlarını qorumaq üçün sona qədər dirənirlər.

İstəyinə çata bilməyən düşərgə direktoru yeni hiyləyə əl ataraq bu dəfə düşərgəyə çətin tərbiyə olunan yeniyetmələri cəlb edir. Onun məqsədi narahat qonaqları bu yolla sıxışdırıb çıxarmaq olur. Nəticədə bir ərazidə iki fərqli tərəf üz-üzə gəlir: evdə sevgi görən əlilliyi olan uşaqlar və tam sağlam olsalar da heç kimə lazım olmayan baxımsız yeniyetmələr.

«Normal olan təkcə mənəm» adlı Rusiya komediya filmi 2021-ci ildə ekranlara çıxıb. Ekran əsərinin quruluşçu rejissoru və baş rol ifaçılarından biri Anton Boqdanovdur. Filmdə həmçinin Olqa Lerman, Konstantin Xabenski və Maksim Vitorqan çəkiliblər.