Şən həyat

Şotlandiyanın paytaxtı Edinburqda keçirilən teatr festivalı həm tanınmış sənətçiləri, həm də karyerasına yeni başlayan istedadları bir araya gətirir. Şöhrət arzusunda olan xor ifaçısı və rəqqasə Canet Cons da bu şəhərə böyük ümidlərlə gələnlər arasındadır.

Taksidə unudulan adi bir qadın çantası gözlənilməz təsadüflərə və məzəli hadisələrə yol açır. Qəribə anlaşılmazlıqlar nəticəsində sadə qız birdən-birə tamaşanın ulduzuna çevrilir, ona aşiq olan və özünü kasıb göstərən gənc oğlanın isə əslində milyonçu olduğu üzə çıxır.

Böyük Britaniya istehsalı olan «Happy Go Lovely» musiqili komediyasını 1951-ci ildə rejissor H. Brüs Hamberstoun çəkib. Baş rolları Devid Niven, Vera-Ellen, Sesar Romero və Bobbi Hous canlandırıblar.