Şərik

Maliyyə analitiki Lourel Ayris öz işini dərindən bilsə də, işgüzar mühitdəki qərəzlər onun vəzifədə yüksəlməsinə imkan vermir. Rəhbər vəzifələrin qadınlara uyğun görülməməsi səbəbindən onun layiq olduğu yer həmkarı Frenkə verilir. Bu ədalətsizlikdən sonra Lourel şirkəti tərk edərək öz müstəqil işini qurmaq qərarına gəlir.

Lakin şəxsi biznesində də vəziyyət ürəkaçan olmur, iri şirkətlər onunla əməkdaşlıq təkliflərini ard-arda rədd edirlər. Çıxış yolu axtaran Lourel cəsarətli bir addım atır: guya Robert S. Katti adlı nüfuzlu bir kişi biznesmenlə şərik olduğunu uydurur və bütün əməliyyatları bu xəyali tərəfdaşın adından icra etməyə başlayır.

«The Associate» adlı komediya filmi 1996-cı ildə ABŞ-da rejissor Donald Pitri tərəfindən lentə alınıb. Baş qəhrəmanı Vupi Qoldberq canlandırıb, digər rollarda isə Dayenn Uist, İlay Uollak və Tim Deyli çəkiliblər.