Amerikan piroqu

Məktəb illəri başa çatmaq üzrədir və dörd yaxın dost hələ də heç bir qızla yaxınlıq etmədiklərini anlayır. Kollecə bu təcrübəsizliklə daxil olmaq fikri onlara qətiyyən xoş gəlmir. Vəziyyəti dəyişmək istəyən gənclər öz aralarında sözləşir və məktəbi bitirənə qədər bu mərhələni arxada qoymağı hədəfləyirlər.

Bütün diqqət və planlar qarşıdan gələn məzuniyyət gecəsinə yönəlir. Qarşıya qoyulan məqsədə çatmaq üçün vaxt son dərəcə azdır və hər bir gənc qarşı cinsin diqqətini çəkmək üçün müxtəlif yollara əl atır. Bu tələskən cəhdlər dostları bir-birindən gülməli və yöndəmsiz vəziyyətlərlə üz-üzə qoyur.

1999-cu ildə ABŞ-da lentə alınan «Amerikan piroqu» filmi sonradan böyük bir franşizaya çevrildi. Rejissor kürsüsündə Pol Vayts və Kris Vaytsın əyləşdiyi komediyada baş rolları Ceyson Biqqz, Kris Kleyn, Tomas İen Nikolas və Eddi Key Tomas canlandırıblar.