Nökər

Moskvada yaşayan 27 yaşlı Qriqori cəzasızlıq mühitinə arxalanaraq istədiyi hərəkətləri edir. Varlı atası oğlunun törətdiyi xətaları ört-basdır etmək üçün dostunun rəhbərlik etdiyi polis şöbəsinə mütəmadi olaraq maşın və avadanlıq alır. Səbri tükənən ata sonuncu insidentdən sonra pasiyentlərini şok üsullarla tərbiyələndirən qeyri-adi bir psixoloqa müraciət edir.

Bir müddət sonra qəzaya düşən oğlan gözlərini kənd tövləsində açır. Ətrafda 1860-cı ilin Rusiya kəndi və təhkimçilik qaydaları hökm sürür, özü isə hüquqsuz nökər Qrişkaya çevrilib. Bu yeni mühitdə itaətsizlik edən şəxsi qamçı zərbələri və hətta camaatın gözü qarşısında dar ağacı gözləyir.

«Nökər» komediya filmi rejissor Klim Şipenko tərəfindən lentə alınıb. 2019-cu ildə Rusiya istehsalı kimi təqdim edilən layihədə baş rolları Miloş Bikoviç, Aleksandra Bortiç, Aleksandr Samoylenko və İvan Oxlobıstin canlandırıblar.