Evdar qadın

Memar Nyuton Devis doğma şəhərində arzuladığı evi tikir və sevdiyi qız Bekkiyə evlilik təklifi edir. Lakin Bekki onun təklifini rədd edir və planlarını puç edir. Məyus olan Nyuton Boston şəhərinə yollanır və yeni tikdiyi evi kimsəsiz qoyur.

Bostonda o, Qven adlı ofisiantla tanış olur və boş qalmış ev barədə ona danışır. Bu əhvalatdan təsirlənən qız həmin şəhərə gedərək Nyutonun xanımı kimi özünü təqdim edir və evə yerləşir. Doğma şəhərinə qayıdan memar isə qonşuların təbrikləri və borc qəbzləri ilə qarşılaşır. Üstəlik, evli olduğunu zənn edən Bekki də Nyutona yenidən maraq göstərməyə başlayır. Əvvəlki sevgisini qaytarmaq istəyən memar bu yalanı davam etdirməyə qərar verir, lakin qohumları və tanışları artıq Qveni çox sevməyə başlayıblar.

1992-ci ildə ABŞ-da istehsal olunmuş «Evdar qadın» («Housesitter») komediya filminin rejissoru Frenk Ozdur. Baş rolları Stiv Martin, Qoldi Houn, Dana Dileyni və Culi Harris canlandırıblar.