Şəhərli qızlar

Molli Qann heç vaxt maddi çətinlik çəkməyib: mərhum rok ulduzunun qızı atasından qalan böyük mirası ziyafətlərdə və bahalı mağazalarda asanlıqla xərcləyir. Lakin şəxsi mühasibi bütün pulları oğurlayıb qaçdıqdan sonra onun qayğısız günləri sona çatır. Tamamilə müflis olan Molli iş axtarmaq məcburiyyətində qalır və səkkiz yaşlı Rey adlı qızcığaza dayəlik etməyə başlayır.

Yaşına görə həddindən artıq ciddi olan balaca Rey nizam-intizama və təmizliyə xüsusi önəm verir. Təcrübəsiz dayə ilə bu balaca qızın qarşılaşması hər ikisinin həyatını dəyişir. Bir-birinə tamamilə zidd olan qəhrəmanlar zaman keçdikcə ümumi dil tapır və həyata fərqli gözlə baxmağı öyrənirlər.

2003-cü ildə çəkilmiş «Uptown Girls» filminin rejissoru Boaz Yakindir. ABŞ istehsalı olan bu komediya və melodram janrlı ekran əsərində baş rolları Brittani Mörfi və Dakota Fanninq canlandırıb.