Arvadımın əri

On üç il Almaniyada qalan Fernan Jyuven nəhayət Fransadakı doğma şəhərciyinə qayıtmaq qərarına gəlir. Doğma yurdunda onu gözlənilməz vəziyyət qarşılayır: hamı onun müharibədə öldüyünü düşünüb, həyat yoldaşı Kristin isə normandiyalı Andre Kolombe ilə yenidən ailə qurub. Üstəlik, Fernanın vaxtilə sahib olduğu restorana da indi bu yeni ər rəhbərlik edir.

Birdən-birə iki ərlə qalan Kristin çıxılmaz vəziyyətə düşür və hansı seçimi edəcəyini dəqiqləşdirmək üçün hər ikisini müvəqqəti olaraq evdən uzaqlaşdırır. Lakin kişilər bir-biri ilə çəkişmək əvəzinə gözlənilmədən dil tapırlar. Rəqiblər tezliklə yaxın dosta çevrilir və qazandıqları azadlığın dadını birlikdə çıxarmağa başlayırlar.

1963-cü il istehsalı olan «La cuisine au beurre» filminin rejissoru Jil Qranjyedir. Fransa və İtaliyanın birgə çəkdiyi komediyada baş rolları Fernandel, Burvil və Kler Morye canlandırıblar.