Nə vaxt evlənirsən?

Yerlan adlı gənc oğlan kitab mağazasında işləyən Bayan adlı qıza aşiq olsa da, onunla yaxınlaşıb danışmağa cəsarət tapmır. Eyni vaxtda ona hərbi xidmətə çağırış vərəqəsi gəlir. Əsgərlikdən yayınmaq istəyən Yerlan qardaşının uşaqlarını öz adına qeydiyyatdan keçirərək kağız üzərində ata rolunu boynuna götürür.

Uşaqlara təşəkkür etmək üçün onları kafeyə aparan gənc orada gözlənilmədən Bayan ilə qarşılaşır. Nə edəcəyini bilməyən Yerlan qıza özünü tənha ata kimi təqdim edir. Bu kiçik yalan qısa müddətdə böyüyərək həm onun, həm də bütün ailəsinin başına gözlənilməz işlər açır.

Qazaxıstan istehsalı olan «Nə vaxt evlənirsən?» romantik komediyası 2024-cü ildə işıq üzü görüb. Filmin quruluşçu rejissoru Medet Kalibekovdur. Əsas obrazları Arnur Kabdoldayev, Aydana Saxari, Adina Mukaşeva və Daniyar Bekjanov canlandırıblar.