Qreqori Mulen bəşəriyyətə qarşı

Qreqori Mulenin bütün həyatı anadangəlmə uğursuzluqlarla doludur: o, ayın 13-ü cümə günü doğulub və elə həmin gün ağlını itirmiş valideynləri pəncərədən tullanıb. Uşaqlıq illərində sevdiyi qız tərəfindən döyülən Qreqorinin gəncliyi də dəli nənəsinin və spirt aludəçisi olan əmisinin yanında əziyyətlə keçib. «Qreqori Mulen bəşəriyyətə qarşı» filminin qəhrəmanı bəxtinin heç vaxt gətirməyəcəyini düşündüyü bir vaxtda təsadüfən cazibədar bir qadına aşiq olur və hisslərini ona etiraf etmək qərarına gəlir.

Lakin sevgilisinə qovuşmaq cəhdi gözlənilməz hadisələrlə nəticələnir. Romantik etiraf xatirinə o, gecə Paris küçələrində qaçaraq qəzəbli futbol azarkeşlərindən, amansız cinayətkarlardan, saxta Hitlerdən və müxtəlif manyaklardan yaxa qurtarmağa məcbur qalır. Çətinliklərə baxmayaraq, Qreqori bəxtinin gətirmədiyi bu həyatda xoşbəxtliyə çatmaq üçün sonadək mübarizə aparır.

2001-ci il istehsalı olan bu Fransa komediyasının rejissoru həm də baş rolu canlandıran Artus de Penqerndir. Ekran əsərində digər rolları Paskal Arbiyo, Elizabet Vitali və Antuan Düleri ifa ediblər.