Jülyetta

Gənc Jülyettanın ailəsi onu kübar nəslin nümayəndəsi Hektor D'Alyen ilə evləndirmək qərarına gəlir və qatarla Parisə yola düşürlər. Dayanacaqların birində Jülyetta kupedə siqaret qabını unudan sərnişinin ardınca perrona qaçır və geriyə gecikir. Qatardan qalan qıza həmin əşyanın sahibi, tanınmış vəkil Andre Landrekur kömək etməli olur. Şəhərdəki otellər tam dolu olduğundan, o, gənc qızı gecələmək üçün öz bağ mülkünə aparır.

Ertəsi gün Jülyettanın getdiyini düşünən Andre axşam evə nişanlısı Rozi ilə qayıdır. Lakin qızın hələ də malikanədə qaldığı məlum olur və vəkil hər iki qadının qarşılaşmaması üçün çarələr axtarmağa məcbur qalır. Rozinin şıltaqlıqları evdəki gərginliyi artırarkən, polis də itkin düşmüş Jülyettanın axtarışına başlayır.

Fransa istehsalı olan «Julietta» filmi 1953-cü ildə nümayiş olunub. Komediya və melodram janrındakı layihənin rejissoru Mark Alleqredir. Baş rolları Jan Mare, Dani Roben, Janna Moro və Nikol Berje ifa ediblər.