Ağılsızlar

Varlı vəkilin qızı Şer Horovits Beverli-Hillzdə yerləşən nüfuzlu məktəbdə təhsil alır. Ciddi müəllim cənab Holl ona semestr üçün yüksək qiymət verməkdən imtina etdikdə, qız rəfiqəsi Dionn ilə birgə pedaqoqun rəğbətini qazanmaq qərarına gəlir. Onlar müəllimi başqa bir həmkarı olan miss Qayst ilə tanış edib aralarını düzəltməyə çalışırlar.

Qiymətləri düzəltməkdə qazandıqları uğurdan sonra qızlar məktəbə yeni gələn Tay Freyzerə yardım etmək niyyətinə düşürlər. Lakin Şer və Dionnun planları təhlükə ilə üzləşir, çünki Tay məktəbdə heç də populyar olmayan tənbəl skeytbordçu Trevis ilə münasibət qurmağa başlayır.

ABŞ istehsalı olan «Clueless» komediya filmini rejissor Emi Hekerlinq 1995-ci ildə lentə alıb. Əsas rolları Alisiya Silverstoun, Steysi Deş, Brittani Mörfi və Pol Radd canlandırıblar.