Morrisvill qəsrinin kabusu

Kriminal müxbir Alen Pinkerton kübar həyatından bəhs edən jurnalın rəhbərindən qeyri-adi bir tapşırıq alır. O, ser Morris Qannibal ilə ledi Klarens Hamiltonun toy mərasiminin keçiriləcəyi Morrisvill qəsrinə yollanır. Qonaqlara ünvanlanan hədə-qorxular jurnalisti qorxutmur, əksinə, onda hadisələrə qarşı daha böyük maraq oyadır.

Dumanlı havada həbsxanadan qaçan cinayətkar Manuel Dias vəziyyəti daha da gərginləşdirir. Qəsrin gələcək xanımı ilə yaxın əlaqəsi olan bu quldur gizli sərvəti ələ keçirməyə çalışır. Fırıldaqçı xəzinə ardınca düşdüyü halda, sirli Kabus onun izini güdür, cəsur jurnalist isə qəsrin bütün gizli məqamlarını üzə çıxarmağa çalışır.

«Morrisvill qəsrinin kabusu» adlı komediya filmi 1966-cı ildə Çexoslovakiyada çəkilib. Ekran əsərinin quruluşçu rejissoru Borjivoy Zemandır, əsas rolları isə Zdenek Skalitski, İrji Koutni, Josef Borovian və Vit Olmer canlandırıblar.