Jozefina

Otuz yaşına çatmaqda olan Jozefina şəxsi həyatının qurulmamasında yalnız öz bədən quruluşunu və formasını günahlandırır. O, sellülit əleyhinə vasitələrdən və müxtəlif üsullardan yapışsa da, nəticə əldə edə bilmir. Qızın yeganə təsəllisi evdə bəslədiyi və Bred Pitt adlandırdığı sevimli pişiyidir.

Bacısının ailə qurması xəbəri Jozefinanın səbrini daşırır. Hamının cütlük tapdığı bir vaxtda tək qaldığını etiraf etmək istəməyən qəhrəman Braziliyadan olan varlı bir cərrahla eşq macərası uydurur və guya onun yanına köçdüyünü elan edir. Bu kiçik yalan tezliklə gözlənilməz hadisələr silsiləsinə və xoşbəxt sonluqlu macəraya yol açır.

«Jozefina» adlı Fransa istehsalı olan romantik komediya filmini 2013-cü ildə rejissor Anyess Obadya ərsəyə gətirib. Baş rolu Alis Pol canlandırıb, digər obrazlarda isə Armel Çaxbi, Karin Lima və Vladis Müller çəkilib.