Ayrı çıxaq

Doğma qardaşların xanımları olan Jansaya və Moldir eyni evdə yaşayır və bir-birləri ilə çox yaxşı yola gedirlər. Amma sərt qayınana ilə birlikdə qalmaq hər iki qadını ayrıca evə çıxmaq barədə düşünməyə vadar edir. Eyni vaxtda ailədən ayrılmaq planı quran gəlinlər birdən-birə rəqibə çevrilirlər.

Çünki qayınana yalnız ən pis gəlinin evdən getməsinə icazə verəcək, yaxşı olanı isə öz yanında saxlayacaq. Azadlıq əldə etmək istəyən gənc qadınlar arasında mübarizə başlayır. Onların hər biri qayınananın gözündə ən yararsız və tənbəl gəlin kimi görünmək üçün əllərindən gələni edirlər.

Qazaxıstan istehsalı olan «Bölek şığayıq» («Ayrı çıxaq») komediya filmi rejissor Nurjan Yerkinulı tərəfindən çəkilib. 2023-cü ilin layihəsində baş rolları Sabira Akatay, Madina Akatay, Karaqöz Tileubekova və Anelya Kenjibekova canlandırıb.