Mənim sevgi hekayəm!!

Yuxarı sinif şagirdi Takeo Qoda iki metrlik boyu və yüz kiloqram çəkisi ilə həmyaşıdlarından xeyli fərqlənir. Məktəbli oğlanlar mehribanlığına görə ona böyük hörmət bəsləsələr də, qızlar Takeoya heç vaxt maraq göstərmirlər. Bütün diqqət onun yaraşıqlı dostu Makoto Sunakavaya yönəlir.

Takeo bir gün Rinko Yamato adlı qızı xoşagəlməz bir vəziyyətdən xilas edir və ona ilk baxışdan vurulur. Lakin gənc oğlan Rinkonun da digər qızlar kimi Makotodan xoşlandığını düşünür. Öz hisslərini kənara qoyan xeyirxah nəhəng qıza bəyəndiyi oğlanla yaxınlaşmağa kömək etmək qərarına gəlir və Rinkonun əslində kimə aşiq olduğunu anlamır.

«Mənim sevgi hekayəm!!» («Ore monogatari!!») filmi 2015-ci ildə Yaponiyada istehsal olunub. Rejissoru Hayato Kavai olan bu melodram və komediya ekran əsərində əsas rolları Ryohei Suzuki, Mei Nagano, Kentaro Sakaguchi və Kentaro Ito canlandırır.