Turş-şirin sevgi

Hepatit diaqnozu ilə xəstəxanaya düşən kök Can-hyok orada tibb bacısı Çon Da-ın ilə tanış olur. Qayğıkeş tibb işçisinin münasibəti gəncin qəlbində hisslər oyadır və onlar görüşməyə başlayırlar. Ətrafdakıların və ailənin bu sevgiyə şübhə ilə yanaşmasına baxmayaraq, cütlük Çoncu adasına getməyi planlaşdırır. Səfər üçün nəzərdə tutulan cütlük köynəyinin əyninə dar gəlməsi səbəbindən Hyok arıqlayacağına söz verir.

Artıq xeyli arıqlamış və dəyişmiş Hyok sevgilisi Da-ın ilə birgə yaşamağa davam edir. Həmin vaxt ona Seuldakı memarlıq bürolarından birində müvəqqəti vəzifə təklif olunur. Avtomobil alan gənc paytaxtdakı gərgin iş rejimi ilə İnçhondakı evi arasında get-gəl etməyə məcbur qalır.

2021-ci il istehsalı olan «Turş-şirin sevgi» (Saekomdalkom) Cənubi Koreya melodram və komediya filmidir. Ekran əsərinin rejissoru Li Qe-byokdur, əsas rollarda isə Kim Mi-he, Ko Qyu-pxil, Son Hva-ryon və Çon Hi-the çəkiliblər.