Dramatik gecə

Keçmiş sevgilisinin toyuna gələn Con-hun burada oxşar vəziyyətdə olan Şi-hu ilə rastlaşır. Hər iki gənc yaxın keçmişdə tərk edildikləri üçün tədbirdə kədərli anlar yaşayır. Həmin gecə spirtli içki qəbul edən cütlük növbəti səhəri eyni yataqda açır.

Baş verənlərdən sonra onlar qeyri-adi bir razılaşmaya gəlirlər. Şərtə görə, Con-hun və Şi-hu cəmi doqquz dəfə görüşməli, bundan sonra isə bir-birlərini heç vaxt axtarmamalıdırlar. Təyin olunmuş bu qısa müddət onların münasibətlərini gözlənilməz istiqamətə aparır.

Cənubi Koreya istehsalı olan «Dramatik gecə» (Geukjeokin harutbam) filmi 2015-ci ildə ekranlara çıxıb. Rejissor Ha Qi-honun çəkdiyi bu romantik komediyada baş rolları Con Su-yon, Pak Byon-ın, Kim So-von və Kim Ce-hva canlandırıb.