Deathrow Gameshow

«Yaşa və ya öl» televiziya layihəsinin iştirakçıları ölüm cəzasına məhkum edilmiş cinayətkarlardır. Müsabiqələrdə qalib gələnlər əfv və ya möhlət qazanır. Məğlubiyyət isə milyonlarla tamaşaçının gözü qarşısında əyləncəli tərzdə dərhal icra olunan edam deməkdir.

Verilişin aparıcısı Çak Toden pərəstişkarlarının sevgisi ilə yanaşı, Qloriya Sternvercin kimi narazı vətəndaşların nifrətinə də öyrəşib. Lakin canlı yayımda mafiya başçısının edam edilməsindən sonra aparıcının həyatında böyük təhlükə yaranır. Cinayətkar qruplaşma liderlərinin qisasını almaq üçün onun izinə düşür.

1987-ci ildə ABŞ-da istehsal olunmuş «Deathrow Gameshow» komediya filminin rejissoru Mark Pirrodur. Ekran işində əsas rolları Con MakKafferti, Pol Bannell, Maykl Aşe və Debra Lamb canlandırıb.