Bərbər və bədheybət

Nyu-Yorkda bərbər işləyən Coy Miller sehrli nağıllara bənzər bir ömür arzulayır. Tale onu qədim ənənələrlə idarə olunan xəyali Slovesiya dövlətinə gətirib çıxarır. Gənc qadın burada ölkə rəhbərinin övladlarına müəllimlik etmək vəzifəsini öz üzərinə götürür.

Ölkəni təkbaşına idarə edən Boris Poçenko adlı dul qalmış, qaşqabaqlı diktator ətrafındakılara qarşı olduqca sərtdir. Amerikalı xanım onun üç uşağının təlim-tərbiyəsi ilə məşğul olmaqla yanaşı, həm də soyuq xasiyyətli bu hökmdarın mürəkkəb xarakterinə uyğunlaşmalı olur.

«The Beautician and the Beast» («Bərbər və bədheybət») filmi rejissor Ken Kuopis tərəfindən ekranlaşdırılıb. ABŞ və Çexiyanın birgə istehsalı olan layihə 1997-ci ildə işıq üzü görüb. Baş rolları Fren Dreşer, Patrik Məlahayd, Vinsent Skyavelli və Maykl Lerner canlandırıblar.