Mənim 5 arvadım

Varlı Monti qadınları çox sevir və hər dəfə asanlıqla evlənir, lakin onun nikahları həmişə uğursuzluqla bitir. Ayrılıqlardan sonra xeyli vəsait itirən qəhrəman Yuta ştatına yollanır və oradakı təbiətə vurularaq torpaq sahələri alır. Lakin o, yerli adətlərdən xəbərsizdir. Məlum olur ki, bu bölgədə çoxarvadlılıq qəbul edilib və ərazinin yeni sahibi əvvəlki sahibin dul qalmış xanımlarını da qəbul etməlidir. Beləliklə, Monti birdən-birə beş qadının ərinə çevrilir.

Qeyri-adi bal ayını təmtəraqla qeyd etmək istəyən baş qəhrəman yerli bankir Qeytsin işlərinə mane olmağa başlayır. Qanqsterlərlə əlbir olan bu bankir mafiyanın köməyi ilə bütün bölgəni ələ keçirmək niyyətindədir. Planlarının qarşısında dayanan Montidən narazı qalan cinayətkarlar ondan birdəfəlik yaxa qurtarmaq qərarına gəlirlər.

«Mənim 5 arvadım» («My 5 Wives») komediya filmi rejissor Sidni C. Fyuri tərəfindən çəkilib. ABŞ və Kanada istehsalı olan bu ekran işi 2000-ci ildə nümayiş olunub. Filmdə əsas obrazları Cerri Stiller, Li Cey Bemberi, Emi Stiller və Con Pinett canlandırıblar.