Payız bağları

Vensan uzun illər dövlət qarşısında böyük xidmətlər göstərib. Gənc vaxtlarında bioloq olan bu adam ölümcül eşşəkarıları və qıcolma törədən birələrdən ibarət gizli kütləvi qırğın silahı hazırlayıb otuz yaşında Elmlər Akademiyasına seçilmişdi. İstedadını başqa yönə çevirmək istəyən rəhbərlik onu kənd təsərrüfatı naziri təyin etmiş, o isə vəzifə kreslosunda altmış yaşını ötərək keçmiş uğurları ilə kifayətlənən yaşlı bir məmura çevrilmişdi.

Lakin Vensanın rahat həyatı düşmənlərinin səbirlə hazırladığı planlarla sarsılır. Paytaxt bulvarlarında qəfil etiraz aksiyaları başlayır, traktorlar yolları bağlayır, küçələrə peyin tökülür, ətrafı başıboş inəklər, qoyunlar və ördəklər bürüyür. Belə təşkil olunmuş çıxışların ardınca nazir gözlənilmədən öz mövqeyini itirib küçədə qalır.

«Payız bağları» (Jardins en Automne) komediya filmi 2006-cı ildə Fransa, İtaliya və Rusiya birgə istehsalı ilə çəkilib. Rejissor Otar İoselianinin ərsəyə gətirdiyi layihədə əsas obrazları Severen Blanşe, Jasinta Jake, Lili Lavina və rejissorun özü canlandırıb.