Karantin hekayələri

Məcburi təcrid rejimi insanları öz dörd divarı arasına qapayaraq onları qeyri-adi sınaqlarla üz-üzə qoyur. İspaniya istehsalı olan «Karantin hekayələri» komediya filmi qapalı məkanda cərəyan edən beş fərqli vəziyyəti əks etdirir. Qəfil dəyişən gündəlik həyat gözlənilməz cinayətlərə, sevgi macəralarına və qəribə toqquşmalara zəmin yaradır.

Novellaların hər birində fərqli personajların qəribə taleyi göstərilir. Təhlükəli qatil özünə sevgili tapır, gənc cinayətkar isə qətllər törətməyin yollarını Zoom vasitəsilə öyrənməyə çalışır. Eyni zamanda utancaq bir gənc qonşusuna vurulur, aktrisanın sınaq çəkilişi ərinin həyatını alt-üst edir, digər bir cütlük isə ən qəribə nahar məclisini təşkil edir.

Ekran əsərinin quruluşçu rejissorları Alvaro Fernandes Armero və Xuan Dieqo Bottodur. Film 2020-ci ildə İspaniyada çəkilib. Baş rolları Karlos Bardem, Rafa Kastexon, Alberto Amman və Mariya Luiza Mayol canlandırıblar.