Sonumuz Çatdı

Nəhəng asteroid Yer kürəsinə yaxınlaşır və planetin tamamilə məhv olmasına sayılı saatlar qalır. Baş qəhrəman Liza isə bu qlobal fəlakətin astanasında vida əyləncəsi təşkil etməyə qərar verir. Belə bir vaxtda qonaqlıq qurmaq adi günlərdəkindən qat-qat çətin və mürəkkəb bir işə çevrilir.

Ardı-arası kəsilməyən uğursuzluqlar Lizanın planlarını alt-üst edir. Nəticədə o, bütün Los-Anceles şəhərini piyada qət etmək məcburiyyətində qalır. Bu qəribə yürüşdə ona bir neçə il əvvəlki gənc versiyası yoldaşlıq edir.

«How It Ends» komediya filmi 2021-ci ildə ABŞ-da lentə alınıb. Layihənin rejissor kürsüsündə Deril Veyn və Zoi Lister Cons əyləşib. Əsas rolları Nik Kroll, Anjelika Kebral, Lamorn Morris və Şeron Van Etten ifa edirlər.