Nessuno mi può giudicare

Otuz beş yaşlı Alisa əri və doqquz yaşlı oğlu ilə birlikdə Romanın ən bahalı rayonlarından birindəki dəbdəbəli villada qayğısız ömür sürürdü. Lakin qəza nəticəsində həyat yoldaşı dünyasını dəyişdikdən sonra hər şey alt-üst olur. Qadın təkcə sevdiyi insanı deyil, bütün var-dövlətini də itirir və böyük borclarla tək qalır.

Əvvəlki evindən çıxmaq məcburiyyətində qalan ana oğlu ilə birgə Romanın kənar qəsəbəsinə köçür. Fərqli mədəniyyətlərdən olan insanların arasında özünü yad hiss edən Alisa borcları bağlamaq və övladını saxlamaq üçün təcili qazanc yolu axtarır. Çıxış yolunu isə eskort xidmətləri sahəsində tapır.

2011-ci ildə çəkilmiş bu İtaliya istehsalı komediya filminin rejissoru Massimiliano Brunodur. Filmdə əsas rolları Anna Folyetta, Lüsiya Okone, Fabritsio Cannini və Karlo Luka De Ruccieri canlandırıblar.