(Gözlənilməz) şahzadə

«(Gözlənilməz) şahzadə» («Un prince (presque) charmant») filminin baş qəhrəmanı Jan-Mark karyerasına həddən artıq bağlı olan, həyatdan soyumuş boşanmış bir adamdır. O, mühüm iş müqaviləsi bağlamağa çalışarkən doğma qızının toy mərasimini az qala unudur. Mərasimə cəmi iki gün qalmış Jan-Mark tələsik yola düşməyə məcbur olur.

Bu səfər zamanı onun qarşısına tamamilə fərqli xarakterə malik Mari adlı gənc qadın çıxır. Zəmanənin qaydalarına baxmayaraq, Mari təmənnasız sevgiyə və xəyallarındakı ağ atlı şahzadəyə inanan səmimi bir xəyalpərəstdir. Bu təsadüfi yol yoldaşlığı hər iki personaj üçün gözlənilməz hadisələrlə yadda qalır.

Fransa istehsalı olan melodram janrlı filmin rejissoru Filipp Lelluşdur. 2012-ci ildə çəkilmiş ekran əsərində baş rolları Xloya Kullu, Reno Sestr, Rocer Maçado və Nikol Kalfan canlandırıblar.