Qanun naminə sarışın

El Vuds universitet qızlar klubunun rəhbəridir və tələbə şəhərciyinin ən populyar gənci Uorner Hantinqton ilə görüşür. Qız tezliklə sevgilisindən evlilik təklifi alacağına tam əmindir. Lakin Uorner onu həddindən artıq qeyri-ciddi hesab edərək münasibəti bitirir və Harvard Universitetinin hüquq fakültəsinə daxil olub daha savadlı bir xanımla evlənmək istədiyini bildirir.

Bir neçə həftəlik kədərdən sonra El sevgilisini geri qaytarmaq üçün hərəkətə keçməyə qərar verir. O, heç kimin gözləmədiyi bir addım atır və Uornerin arxasınca həmin nüfuzlu təhsil ocağına yollanır.

«Legally Blonde» filmi 2001-ci ildə ABŞ-da istehsal olunub və rejissor Robert Luketiç tərəfindən lentə alınıb. Komediya və melodram janrındakı ekran əsərində Qreq Serano, Korina Reyli, Codi Harris və Nektar Rouz kimi aktyorlar rol alıb.