Maaş günü

Sadə bir inşaat fəhləsinin gündəlik həyatı bir-birinə bənzəyən yorucu hadisələrdən ibarətdir. Səhər tezdən ağzınacan dolu olan tramvaya minməyə çalışan qəhrəman böyük çətinliklə tikinti meydançasına çatır. Tikintidə isə onu ağır fiziki iş, kərpic daşımaq və nəzarətçinin gözündən yayınmaq cəhdləri gözləyir.

İş vaxtı başa çatdıqdan sonra da qayğılar azalmır. Evə qayıdarkən tramvaydakı basabas yenidən təkrarlanır, ən əsası isə qazanılan məbləği qorumaq məsələsi ortaya çıxır. Qəhrəman halal zəhmətlə qazandığı pulun heç olmasa bir hissəsini bütün maaşı əlindən almağa çalışan sərt həyat yoldaşından gizlətmək məcburiyyətində qalır.

«Maaş günü» (Pay Day) 1922-ci ildə ABŞ-da istehsal olunmuş qısametrajlı komediya filmidir. Ekran əsərinin rejissoru və baş rol ifaçısı Çarlz Çaplindir. Filmdə həmçinin Fillis Allen, Mak Sueyn və Edna Pörviens çəkilmişlər.