Bu, bir gecə baş vermişdi

Varlı ailənin qızı Elli məşhur təyyarəçi Kinq Vestli ilə ailə qurmağa hazırlaşır. Lakin qızın atası bəy namizədini avaralıqda ittiham edərək bu izdivaca qəti şəkildə qarşı çıxır. Qızını ev dustağı edən ata nişanı pozmaq yollarını axtarsa da, Elli qaçaraq Nyu-Yorka gedən avtobusa minməyi bacarır.

Həmin avtobusda indicə işdən qovulmuş jurnalist Piter də səfər edir. Redaktoru ilə münasibətlərini düzəltmək üçün müxbirə təcili olaraq böyük bir sensasiya lazımdır. Bütün ölkə polisinin axtardığı qaçqın milyonçu qızla rastlaşmaq Piter üçün əsl fürsətə çevrilir.

1934-cü ildə ekranlara çıxan «Bu, bir gecə baş vermişdi» romantik komediya filminin rejissoru Frenk Kapradır. ABŞ istehsalı olan bu kinolentin baş rollarını Klark Qeybl, Klodett Kolber, Uolter Konnolli və Rosko Karns canlandırıblar.