Onlar kimdir?

Qırx yaşına yaxınlaşan Davidin bütün diqqəti karyerasına yönəlib. O, şirkət rəhbərinin rəğbətini qazanmaq, vəzifədə yüksəlmək və maaş artımı əldə etmək üçün çalışır. Nəhayət, vacib bir patent layihəsini təqdim etmək tapşırığı alan David üçün çoxdan gözlədiyi şans yaranır.

Təqdimatdan cəmi bir gün əvvəl onun qarşısına Marçello adlı qəribə bir adam çıxır. Yeni tanış Davidə təriflər yağdırır, birlikdə içməyi və iki xanımın gözlədiyi evə getməyi təklif edir. Bu hiyləgər fırıldaqçının təsirinə düşən David, Marçello və onun gözəl şəriklərinin macəra dolu oyununa cəlb olunur.

«Loro chi?» adlı İtaliya istehsalı komediya filmi rejissorlar Fabio Bonifacci və Françesko Miççike tərəfindən çəkilib. 2015-ci ildə ekranlara çıxan kinoda rolları Antonio Katanya, Suzi Laude, Ivana Lotito və Kristian Cinepro canlandırıblar.