Məni Aya apar

1960-cı illərin sonunda iki dövlət arasında kosmik yarış son həddə çatır. Sovet İttifaqı peyk və insan uçuşları ilə önə çıxdıqdan sonra ABŞ «Apollon-11» missiyası ilə Aya eniş etməyə çalışır. Layihənin nüfuzunu xalqın gözündə qaldırmaq istəyən hökumət nümayəndəsi Mo Berkus bacarıqlı reklam mütəxəssisi Kelli Consu işə cəlb edir. Lakin Kellinin addımları uçuş rəhbəri Koul Devis tərəfindən birmənalı qarşılanmır.

Missiyaya olan maraq pik həddə çatdıqda mütəxəssislər arasında narazılıqlar daha da artır. Planların reallaşması çətinləşdikcə Mo Berküs Kelliyə ehtiyat tədbiri görməyi tapşırır. Beləliklə, missiya uğursuzluqla nəticələnəcəyi təqdirdə ictimaiyyətə göstərmək üçün alternativ ssenari hazırlanır.

«Fly Me to the Moon» filmi 2024-cü ildə rejissor Qreq Berlanti tərəfindən lentə alınıb. Komediya və melodram janrlarını birləşdirən ekran əsəri ABŞ və Böyük Britaniyanın ortaq istehsalıdır.