Təxəyyül uçuşu

Viktor Buzovun zahirən qaydasında gedən ailə həyatı və yaxşı işi var, lakin bu sakitlik ona darıxdırıcı gəlir. O, artıq altı aydır ki, Nijni Novqorodda yaşayan gənc sevgilisi Marinanın yanına gedib-gəlir. Səfərlərini arvadından gizlətmək üçün Viktor xəstə uşaqlıq dostu haqqında əhvalat uydurur və guya ona kömək etdiyini deyir. Yalanlarının üstü açılmasın deyə, kişi uydurma dostu haqqında bütün xırdalıqları xüsusi dəftərə qeyd edir.

Bir gün həmin qeyd dəftəri oğurlanır və Viktorun qurduğu yalanlar özünə qarşı çevrilir. Çox keçmədən Maksim adlı tanış olmayan bir şəxs uydurulmuş həmin dost cildində Viktorun mənzilinə gəlir və orada yerləşir. Qəhrəman öz uydurduğu personajın gerçək həyatında peyda olması qarşısında çaşqın qalır və vəziyyətdən çıxış yolu axtarmağa məcbur olur.

«Təxəyyül uçuşu» komediya filmi 2008-ci ildə Rusiyada çəkilib. Ekran əsərinin quruluşçu rejissoru Yuri Kuzmenkodur. Baş rolları Aleksandr Makoqon, Pyotr Krasilov, Mariya Kulikova və Yevgeniya Loza canlandırıblar.