Çinli nənə

Əyalət şəhərciyində yerləşən köhnə və təmirsiz binanın sakinləri yalnız pensiya ilə dolanmağa çalışan yaşlı insanlardır. Onların bütün fikri-zikri bu az təqaüdlə birtəhər ayaqda qalmaq qayğılarına yönəlib. Həyətdəki sakit və yeknəsəq günlər qəhrəmanlardan birinin yanına gözlənilməz qonağın gəlişi ilə pozulur.

Ev sahibəsinin bacısı onun yanına köçərək qocaların gündəlik həyatına tamam başqa ab-hava qatır. Çin mədəniyyətinə böyük maraq göstərən bu qadın fenshuy qaydalarını öyrənir, ətirli çubuqlar yandırır və ipək parçaları sevir. Onun bu fərqli həyat tərzi kədərli günlər keçirən ahıl insanların həyatını birdən-birə şən bir bayrama çevirir.

«Çinli nənə» (Kitayskaya babushka) filmi 2009-cu ildə rejissor Vladimir Tumayev tərəfindən çəkilib. Komediya və melodram janrlarını birləşdirən Rusiya istehsalı olan bu ekran əsərində baş rolları Nina Ruslanova, İrina Muravyova, Aleksandr Mixaylov və Kira Kreylis-Petrova canlandırıblar.