Roma yürüşü

Birinci Dünya müharibəsindən sonra iki keçmiş cəbhə yoldaşı İtaliyada həyatlarını qurmağa çalışır. Fəndgir romalı Domeniko Rokketti Milanda dilənçilik edir, sadəlövh kəndli Umberto Qavattso isə qohumları tərəfindən evdən qovulub. Çıxış yolu axtaran bu iki nəfər təzəcə yaranan faşist hərəkatına qoşulur. Süpürgəçilərin tətili zamanı polislə toqquşmada iştirak etdikləri üçün onlar iki il azadlıqdan məhrum edilir.

Paytaxta doğru yürüş ərəfəsində silahdaşları onları həbsxanadan azad edir. Lakin siyasi proseslərdə iştirak yoldaşların bu hərəkata inamını tezliklə alt-üst edir. Günahsız bir dəmiryolçunun vəhşicəsinə qətlə yetirilməsi dostları sarsıdır və onlar Mussolininin hakimiyyətə gəldiyi an təşkilatı tərk etmək qərarına gəlirlər.

«Roma yürüşü» filmi 1962-ci ildə ekranlara çıxıb. İtaliya və Fransa birgə istehsalı olan bu kinokomediyanı rejissor Dino Rizi lentə alıb. Əsas rolları Vittorio Qassman, Uqo Tonyatssi, Roje Anen və Mario Breqa canlandırıblar.