İtalyanlar

«İtalyanlar» komediya filmi fərqli ölkələrdə cərəyan edən iki müstəqil əhvalatdan ibarətdir. Birinci hissə təcrübəli fırıldaqçı Fortunato ilə gənc köməkçisi Marçellonun macəralarından bəhs edir. Onlar Romadakı qaçaqmalçıların tapşırığı ilə oğurluq Ferrari maşınlarını Səudiyyə səhrasından keçirərək Birləşmiş Ərəb Əmirliklərinə aparırlar. Çətin yol yoldaşlığı dostluğa çevrilir, lakin Dubaydakı əyləncə gecəsi onları həbsxanaya və səhəri gün sürətli yarışlara aparır.

İkinci hissənin qəhrəmanı isə ailə böhranı yaşayan uğurlu stomatoloq Culiodur. Yorğun həkim həmkarının təkidi ilə Sankt-Peterburqdakı beynəlxalq konfransa getməyə razılaşır. Rusiyada ona Vera adlı tərcüməçi bələdçilik edir. Culio tezliklə gözləmədiyi cinayətkar və qarışıq bir hadisənin içinə düşür və yalnız Veranın səyləri nəticəsində salamat qalır.

Film 2009-cu ildə rejissor Covanni Veronezi tərəfindən İtaliyada çəkilib. Baş rolları Sercio Kastellitto, Rikkardo Skamarço, Karlo Verdone və Kseniya Rappoport canlandırıb.