Vivaha Bhojanambu

Sığorta agenti Maheş hər qəpiyə qənaət etməyə öyrəşmiş son dərəcə xəsis biridir. Buna baxmayaraq, o, varlı ailədən olan Anita adlı gənc qadının sevgisini qazanmağı bacarır. Qızın atası başda olmaqla qohumları bu izdivaca qarşı çıxsalar da, Anitanın babası gənclərə dəstək verir. COVID-19 pandemiyasının başlaması səbəbindən toy mərasimi kiçik miqyasda, yalnız ən yaxın insanların iştirakı ilə keçirilir.

Əsas hadisələr nikah bağlandıqdan dərhal sonra başlayır. Ölkə boyu qəfil karantin elan olunur və hərəkət məhdudlaşdırılır. Nəticədə gəlinin çoxsaylı qohumları qənaətcil Maheşin evinə sığınmalı olur və onlar uzun müddət eyni dam altında qalmağa məcbur olurlar.

2021-ci il istehsalı olan «Vivaha Bhojanambu» Hindistan komediya filmidir. Ekran əsərinin rejissoru Ram Abbarajudur. Baş rolları Satya, Harşa Çemudu, Nithya Sree və Şrikant İenqar canlandırıblar.