Motichoor Chaknachoor

Bhopal şəhərində yaşayan gənc Anita xaricə köçmək arzusu ilə alışıb-yanır və yalnız başqa ölkədə yaşayan bir şəxslə evlənmək fikrində qətidir. Öz şıltaq xarakteri və bu sərt tələbi üzündən qızın bütün elçilikləri uğursuzluqla nəticələnir. Həmin vaxt qonşuluqda Dubayda mühasib işləyən 36 yaşlı Puşpinder Tyaqi peyda olur. O da öz növbəsində nəyin bahasına olursa-olsun ailə qurmaq üçün təcili xanım axtarır.

Qonşusunun xaricdə çalışdığını öyrənən Anita fürsəti əldən verməmək qərarına gəlir. Doğma şəhərindən uzaqlara getmək istəyən qız bu adamın könlünü ovlamaq və onunla nikaha girmək üçün plan qurmağa başlayır. Hər iki tərəfin fərqli maraqlar güddüyü bu münasibət gözlənilməz hadisələrlə davam edir.

«Motichoor Chaknachoor» romantik komediya filminin rejissoru Debamitra Biswaldır. Hindistan istehsalı olan bu ekran əsərində baş rolları Navazuddin Siddiqui, Atya Şetti, Vibha Çhibber və Karuna Pandey canlandırıblar. Ekran işi 2019-cu ildə təqdim edilib.