Bədənlərini dəyişdilər

Uğurlu iş qadını Paola bütün vaxtını karyerasına sərf etdiyindən övladlarına diqqət yetirə bilmir. Ailənin və uşaqların qayğısına isə illərdir evdə çalışan xeyirxah xadimə Qvadalupe, yəni Lupe qalır. Anasının sevgisindən məhrum olan kiçik oğul axan ulduz gördükdə mehriban Lupenin onun anası olmasını arzulayır.

Ertəsi gün uşağın bu istəyi qeyri-adi şəkildə gerçəkləşir və hər iki qadın bir-birinin bədənində oyanır. İndi rəhbər xanım ev işlərinin öhdəsindən gəlməli, sadə xadimə isə şirkət idarəçiliyinə alışmalıdır. Qəhrəmanlar tamamilə yad həyatlara uyğunlaşmağa çalışarkən hər şeyi əvvəlki vəziyyətinə qaytarmağın yolunu axtarırlar.

«Intercambiadas» komediya filmi 2019-cu ildə Peru kinematoqrafçıları tərəfindən çəkilib. Ekran əsərinin rejissoru Daniel Veqa Vidal, baş rol ifaçıları isə Joanna San Migel, Patrisiya Portokarrero və Matias Rayqadadır.