Annanukku Jey

Matta Sekar xurma şərabı satan atası Muruqesana kömək edərək günlərini keçirir. Yerli siyasətçi Selva onların məhəlləsində öz barını açanda ailənin işləri təhlükə altına düşür. Sakinlərin ənənəvi içkini seçdiyini görən Selva hakimiyyətdəki əlaqələrini işə salır, Muruqesana sataşır və onun kiçik ticarətini darmadağın edir.

Atasının alçaldılması ilə barışa bilməyən Sekar qisas almaq və ailəsini qorumaq qərarına gəlir. O, başqa bir təcrübəli partiya xadiminin köməyinə arxalanaraq siyasət aləminə daxil olur. Beləliklə, gənc qəhrəmanın nüfuzlu rəqiblə açıq mübarizəsi başlayır.

Hindistan istehsalı olan «Annanukku Jey» filmi 2018-ci ildə işıq üzü görüb. Rejissor Racqumarın çəkdiyi komediyada baş rolları Dineş, Mahima Nambiar, Radha Ravi və Mayilswamy canlandırıb.