Pokkiri Simon

Trivandrum şəhərində yaşayan Saymon və yaxın dostları tamil kino ulduzu Vicayın çılğın pərəstişkarlarıdır. Baş qəhrəman sevimli aktyorunun tərzini və davranışlarını təkrarlayır, bütün vaxtını yerli fan-klubun tədbirlərinə və yeni filmlərin nümayişinə həsr edir. Saymonun heç yerdə işləməməsi və qayğısız yaşaması oğullarının gələcəyindən nigaran qalan valideynlərini bərk narahat edir.

Kinoteatrlardan birində Saymonun qarşısına Dipa adlı bir qız çıxır və gənc oğlan ona aşiq olur. Yeni hisslərə qapılan qəhrəman bu andan etibarən Dipanın diqqətini çəkməyə və onun sevgisini qazanmağa can atır. Beləliklə, Saymonun həyatı həm pərəstiş etdiyi ulduzun tədbirləri, həm də eşq macərası ətrafında davam edir.

"Pokkiri Simon" komediya filmi 2017-ci ildə Hindistanda rejissor Cico Entoni tərəfindən ekranlaşdırılıb. Filmdə əsas obrazları Sanni Ueyn, Prayaqa Martin, Ceykob Qreqori və Sarat Kumar canlandırıblar.