Toy planı

Mixal üçün toy hazırlıqlarının ən qaynar vaxtında gözlənilməz hadisə baş verir: nişanlısı evlənmək fikrindən daşındığını bildirir. Bu gözlənilməz addım gənc qadının bütün arzularını alt-üst edə bilərdi, lakin o, təslim olmaq niyyətində deyil.

Təyin edilmiş gündə gəlinlik geyinmək istəyən Mixal mərasimi ləğv etməkdən qəti şəkildə imtina edir. Qarşıdakı bir ay ərzində taleyin ona yeni bir həyat yoldaşı yetirəcəyinə sidq-ürəkdən inanaraq nikah hazırlığını davam etdirir.

İsrail istehsalı olan «Laavor et hakir» romantik komediyası 2016-cı ildə rejissor Rama Burşteyn tərəfindən lentə alınıb. Filmin əsas rollarını Noa Koler, Amos Tamam, Oz Zahavi və İrit Şeleg canlandırıblar.