Tomas Kraun Fırıldağı

Varlı maliyyəçi Tomas Kraun gündəlik həyatın darıxdırıcılığından qurtulmaq üçün cəsarətli addım atır. O, böyük muzeylərin birindən Klod Monenin yüz milyon dollar dəyərində olan məşhur rəsm əsərini oğurlayır. Qüsursuz planlaşdırılmış bu soyğunçuluq hüquq-mühafizə orqanlarını çaş-baş qoyur.

İtirilmiş sənət əsərinin axtarışı ilə sığorta şirkətinin müstəntiqi Ketrin Benninq məşğul olmağa başlayır. Onun əsas vəzifəsi cinayətkarı ifşa etmək və qiymətli tablonu geri qaytarmaqdır. Çox keçmədən zəngin şübhəli ilə işinin peşəkarı olan qadın arasında gərgin bir qarşıdurma yaranır.

«The Thomas Crown Affair» adlı cinayət trillerini amerikalı rejissor Con Maktirnan lentə alıb. 1999-cu ildə ABŞ-da istehsal olunmuş filmin baş rollarında Pirs Brosnan, Rene Russo, Denis Liri və Fey Danauey çəkiliblər.