Kruella

Estella uşaqlıqdan bəri üsyankar xarakteri və ədalətsizliyə qarşı barışmazlığı ilə seçilirdi. Başqa bir məktəbdən qovulduqdan sonra o, anası ilə birgə Londona köçmək qərarına gəlir. Səfər əsnasında onlar məşhur dəb xadimi Baronessanın malikanəsinə baş çəkirlər, lakin burada baş verən bədbəxt hadisə anasının ölümü ilə nəticələnir. Paytaxtda tək qalan qızcığaz küçə fırıldaqçıları olan Caspar və Horas adlı iki oğlanla tanış olur.

On il sonra bu üçlük London küçələrində xırda oğurluqlarla məşğul olmağa davam edir. Bütün bunlara baxmayaraq, Estella yüksək moda aləmində yer almaq arzusundan əl çəkmir. O, hiylə işlədərək şəhərin dəbdəbəli mağazalarından birində işə düzəlir və tezliklə Baronessanın diqqətini çəkir. Nüfuzlu qadın gənc istedadı öz dizaynerlər heyətinə qəbul edir.

Kriminal komediya janrında olan «Cruella» filminin rejissoru Kreyq Gillespidir. 2021-ci ildə ABŞ, Böyük Britaniya, Kanada və İrlandiyanın birgə istehsalı ilə çəkilən layihədə baş rolları Emma Stoun, Emma Tompson, Coel Fray və Pol Volter Hauzer canlandırıb.