Qaç

Seyf qarətçisi Saşanın növbəti işi gözlənilməz hadisə ilə nəticələnir. Özgə evinə daxil olan oğru, ev sahibi Çernovun öz həyat yoldaşını öldürməsinə təsadüfən şahidlik edir. Cinayətin üstünün açılmasını istəməyən ev sahibi qaçmağa çalışan şahidin izinə düşür.

Saşanın vəziyyəti ailə problemləri səbəbindən daha da qəlizləşir. O, dağılmaq üzrə olan evliliyini xilas etmək üçün nəyin bahasına olursa-olsun oğlunun bağçadakı tədbirinə vaxtında çatmalıdır. Beləliklə, o, bir tərəfdən təqibdən qurtulmağa, digər tərəfdən isə uşağının yanına tələsməyə məcbur qalır.

«Qaç» adlı cinayət komediyası 2025-ci ildə Rusiyada rejissor Roman Artemyev tərəfindən çəkilib. Ekran əsərinin əsas obrazlarını Nikita Koloqrivıy, Mixail Poreçenkov, Daniil Spivakovski və Valentina Mazunina canlandırıblar.