Şam ağaclarının arxasındakı yer

Motosiklet kaskadyoru Lyuk Qlenton şəhərləri gəzərək təhlükəli nömrələr göstərir və bu yolla dolanır. Növbəti çıxışından sonra o, keçmiş sevgilisi Romina ilə qarşılaşır və ondan Ceyson adlı biryaşlı oğlunun olduğunu öyrənir. Uşağı təmin etmək məqsədilə şoudakı işini buraxsa da, qadın onu qəbul etmir, çünki artıq Kofi adlı başqa bir şəxslə münasibətdədir.

Buna baxmayaraq şəhərdə qalan Lyuk, Robin adlı mexanikin yanında köməkçi kimi çalışmağa başlayır. Qazandığı zəhmət haqqı uşağın ehtiyaclarını ödəməyə yetmir. Vəziyyəti görən Robin ona bank soyğununa əl atmağı təklif edir.

«The Place Beyond the Pines» kriminal trillerini Derek Sianfrans lentə alıb. 2012-ci ildə ABŞ-da istehsal olunmuş layihənin baş rollarında Rayan Qoslinq, Bredli Kuper, Deyn DeHaan və Eva Mendes çəkiliblər.