Həyatın açarı

İşsiz aktyor Sakurai ard-arda gələn uğursuzluqlardan sonra çıxış yolunu həyatına son qoymaqda görür, lakin kəndirin qırılması ilə bu cəhd də yarımçıq qalır. Yerdə uzanmış vəziyyətdə hamam üçün nəzərdə tutulmuş talon tapan Sakurai oraya getməyi qərara alır. İctimai hamamda o, zəngin bir adam olan Kondonun yıxılaraq yaddaşını tamamilə itirdiyini görür.

Vəziyyətdən dərhal istifadə edən Sakurai dolabın açarını dəyişdirərək huşsuz vəziyyətdəki yadellinin yerinə keçir. Əslində kim olduğunu xatırlamayan Kondo özünü uğursuz bir aktyor kimi tanımağa məcbur qalarkən, Sakurai isə özgəsinin təmtəraqlı və sirli dünyasına addım atır.

2012-ci ildə ekranlara çıxmış Yaponiya istehsalı olan «Kagi Dorobou No Method» («Həyatın açarı») filminin rejissoru Kenji Uchidadır. Ekran əsərində əsas rolları Masato Sakai, Teruyuki Kagawa, Ryoko Hirosue və Yoshiyoshi Arakawa canlandırıblar.