Berni ilə həftəsonu

Sığorta şirkətində çalışan iki gənc əməkdaş sənədləri yoxlayarkən qəribə saxtakarlıq aşkar edirlər: kimsə vəfat etmiş şəxsin sığorta pulunu təkrar-təkrar mənimsəyib. Bu barədə dərhal rəhbərləri Berniyə məlumat verirlər, lakin mənimsəmənin arxasında elə onun özü dayanır. İşçilərdən qurtulmaq istəyən rəis onları okean sahilindəki villasına qonaq çağırır və mafiyadakı dostlarına onların qətlini sifariş edir.

Lakin cinayətkar qruplaşmanın başçısı Berninin onun sevgilisi ilə görüşdüyünü öyrənərək əmri dəyişir və Bernini aradan qaldırır. Evə gəlib rəhbərlərinin cəsədi ilə qarşılaşan iki dost onu sağ kimi qələmə verməyə məcbur olurlar. Əylənən qonaqların içkili vəziyyətdə olması bu oyunu bir müddət davam etdirməyə imkan verir.

«Weekend at Bernie's» filmi 1989-cu ildə ABŞ-da istehsal olunub. Kriminal komediya janrında olan bu ekran işinin rejissoru Ted Kotçeffdir. Baş rolları Endrü Makkarti, Conatan Silverman, Katrin Meri Stüart və Terri Kayzer canlandırıblar.