Təşvişli zəng

Fövqəladə xidmət operatorunun işi yüksək diqqət tələb edir, çünki kiçik bir səhv faciə ilə nəticələnə bilər. Cordan Törner xilasetmə mərkəzində çalışarkən evinə yad adam girən yeniyetmə qızdan zəng alır. Danışıq qəfil kəsildikdə o, nömrəyə təkrar zəng edir və telefon səsi cinayətkara gizlənən qızın yerini bəlli edir. Hadisə qətllə bitdikdən sonra Cordan canlı xətdən uzaqlaşmağa qərar verir.

Altı aydan sonra keçmiş operator yeni gələn əməkdaşların təlimi ilə məşğul olur. Növbələrin birində təcrübəsiz işçi maşının baqajına salınaraq qaçırılan digər bir qızın zəngi qarşısında çaşqınlıq yaşayır. Vəziyyətin ciddiliyini dərhal anlayan Cordan idarəetməni öz üzərinə götürür və xəttə qoşulur.

ABŞ istehsalı olan «The Call» cinayət dramının quruluşçu rejissoru Bred Andersondur. 2013-cü ildə təqdim edilən trillerin baş rollarını Holli Berri, Ebiqeyl Breslin, Morris Çestnat və Maykl Eklund canlandırıb.